CBI hnena General Consent pek chungchangah ZPM in thu diklo sawi: Lalnunmawia Chuaungo, Sr. Vice President, MPCC

by News Editor

Tualchhung News

ZORAM TODAY| 10th July, 2024 (Wed): Vawiin khan MPCC Vigilance Cell chuan Aizawl Press Club-ah thuthar thehdarhtute kawmin, Sorkarin CBI hnêna General Consent pêk chungchanga Mizoram Sorkar thil tih dân leh inthlan hma leh thuneihna an chân hnua Chief Minister Lalduhoma thusawi chu a in anglo hle niin an tarlang.

MPCC Vigilance Cell Chairman Lalnunmawia Chuaungo chuan, ZPM in kum 2023 December ni 28-a General Consent a pêk leh kumin July ni 1-a an pêk chu danglamna awm lo, in angreng anga an sawi chu General Consent awmzia, dân leh Court-in a pawmpui loh hmangin a sawifiah a.

Lalnunmawia Chuaungo chuan, a pawimawh ber chu Mizoram Sorkar hnuaia hna thawkte chhui phalna CBI hnena pêk leh pêk loh a ni a, nikum December ni 28-a General Consent an pekah kha chuan Mizoram Sorkar hnuaia hnathawkte chhui phalna a pumhlum a pêk a ni a. Kha order hmang kha chuan CBI in Mizoram Sorkar phalna lak kher ngai loin an duh duhin an rawn chhui thei, a ti.

Tun July ni 1-a order tharah erawh CBI chu Central sorkar hnuaia thawkte leh Public undertaking hnuaia hnathawkte chhui phalna chauh pêk a ni a, Mizoram Sorkar hnuaia hnathawkte an chhui dâwn a nih chuan Mizoram Sorkar hnênah phalna an lak hmasak zêl a ngai tawh, a ti a.

"Hêng order pahnih te hi a hrang hlak a ni a, inang reng anga ZPM Legal Department in an sawi chu dawt muhlum a ni," MPCC Sr. Vice President chuan a ti.